تخيل أنـــــك الرئيـــس...!!؟؟

السلام عليكم ورحمه الله وبركاته

دى مجرد فضفضة ... تنفيييييس

تخيل كدا انك بقيت الرئيس
احلم
يا عم انت حتدفع حاجة من جيبك
الحلم ده على حسابى
غمض عينيك شوية واحلم انك بقيت رئيس البلاد

متقولش ازاى .. مش مهم
زورت الانتخابات ... او قلت للناس انتخبونى احسن ارمى نفسى من فوق البرج فصعبت عليهم قاموا انتخبوك .. او يكون لك واحد صاحبك امريكاوى بتكلمه على الياهوو وقال لبوش انك ولد مجدع ورجولة وكفاءة وانك من بتوع العولمة والعوالم والنظام العالمى الجديد لنج .. ومش من اللى بيصلوا الفجر جماعة ... فوافق بوش انك تقعد على ... الكرسى

المهم انك بقيت دلوقتى رئيس البلاد
مين قدك يا عم

حتاكل طعمية مقلية بزيت فرنساوى وربنا حيتوب عليك من طعمية ابو هويدا المقلية بزيت العربيات

وحتتعالج من انيميا الفول .. الفول الجديد بقه يا عم من غير سوس

وابقى قابلنى لو لقيت اى مسمار فى العيش ... حتاكل عيش من ابو الرغيف بربع جنيه ... سخن وطازة وطرى .. تخيل .. طرى مش زى العيش اللى انت كنت بتاكله وانت بتشرب كباية ميه ورا كل لقمة علشان تنزل

لا لا العيش ابو شلن ده اللى انت كنت بتجيبه من الفرن وعقبال متوصل بيه البيت يسلجم ويقفع ويعرقص ... وتعاقب عليه دوليا لأنه اصبح من اسلحة الدمار الشامل ... لا انسى الكلام ده خالص
الاوضاع حتتغير خالص ياعم ... دا انت ربنا حيكرمك خالص والله العظيم

طب بص دى ... حتاكل لحمة... طب والله لحمة .. متبرقش اوى كدة ... مش عارف يعنى ايه لحمة
(هم هيقولولك )

وبعدين انته مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كدة من السودان واثيوبيا
آه فاكر
اهى هى دى اللحمة
لا لا مش اللى انته كنت بتاكلها فى العيد ، بتاعت العيد دى اسمها كرشة ... متفضحناش بقه الله يسترك

وحيبقى فيه كنتاكى .. متسألش .. دى فراخ يعنى حتودع عم لطفى الفرارجى اللى كان بيعين لك رجلين الفراخ وانت كنت بتقول له عشان الكلب وكان ساعات يفوت لك حتتين قنصة على حتتين كبدة من بتوع الزباين اللى بيستحموا بصابون اجنبى

وحتشرب السيجارة كلها مرة واحدة .. يعنى مفيش تخميس
وبعدين دى سجاير ستراكى سترايك من بتاعت الست مارى منيب .. جو تانى

بس لما يخدوك علشان تحلف اليمين
ياعم دا غير يمين الطلاق اللى انته مصدره فى كل حدوتة تحكيها

اصحى معايا الله يكرمك

لما تروح تحلف اليمين اوعى تروح بالبدلة بتاعت جوازك .. انته عارف ... دى بقت مكيفة الهواء من كل ناحية .. العربى جوز ام بطة عنده بدلة اخوه باعتهالو من بلاد بره ابقى استلفها منه وإقضى مصلحتك وبعدين رجعهاله ... ماهى الجيران لبعضها امال ايه

وحياة رحمة امك يا شيخ متروح بالجزمة بتاعتك ... عشان خاطرى ابقى اشتريلك جوز جزمة من بيع المصنوعات دى رخيصة هناك .... لأن الحدوة اللى انته مركبها فى كعب الجزمة بتعمل صوت .... قلق برضه .. وبعدين ممكن الجهاز يصفر عليك تبقى حكاية ... فاهم

أول يوم بس وبعدين همه بعد كدة حيتصرفولك فى جوزين جزم مستوردين عشان تقابل بيهم اصحابك بتوع الدول التانية

وحتنام على سرير عليه مراتب .. المراتب دى بقه جواها قطن ... ايوة قطن ... والله العظيم قطن .. ايوه تمام زى القطن اللى انته جبته من الاجزخانة للوله حودة ابنك لما الواد شحته ابن ام بيسة لزقه بالطوبة فى نافوخه فتحهاله

وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجانى .... ايوه هو ده القطن ... فهمت

هتحلم أحلام نضيفة على السرير دا يا عم الحاج

افرد طولك ... متخافش رجليك مش حتطلع برة الاوضة .... انته مش فى بيتكم دلوقتى .. افرد افرد ... غمض عينيك كده .. غمض

ايه ... انت نمت اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد علشان بقالك 3 شهور مدفعتش الفاتورة
هههههههههههههههههههههههههههههههههههههااااااااااااا ى

ال ريس ال

زاتخيل ليه ان ابقي ريس انا فعلا رئيس جمهورية نفسي

ههههههههههههههههههههههه جااااااااااااااااامده موت

هههههههههههههههههههههههههه جميلة اوووووووووى

هتودينا فى داهيه خلينا فى احلامنا العاديه احسن
ما اقوم ع كابوس العن من الكوابيس بتاعتى

ههههههههههههههههههههههه ياااااه يانيرو خلينا راضيين بحالنا رءاسة ايه بلا وجع دماغ

ياسلام عادى ههههههههههههههههههه جامده يانيرو

مين عاوز يكون رئيس توبيك رائع خلانا نحلم شويه

» تخيل ؟؟؟؟؟؟؟؟؟؟
» تخيل لو كانت دى جدتك
» تخيل نفسك كمبيوتر
» تخيل نفسك في المواقف دي هتعمل ايه